PICO MONTO

Iste Dominche de nuebas emos feito colla as chens d´o termo e nuestro quiesto Ramón nos recomienda que faigamos  “El  Montó ”,un  chicorrón pico de 2.478mts, que se i troba en meyo d´a bal de Chistau.

Cal amadrugar,pos a endrezera ta ista garreada nos leba a ros puestos mes luen de casa nuestra. A ras zinco d´a maitinada gritar ro reloch ,dimpues de bochar-nos,ye menister debantar-se,bi ha qu´acotraziar  a muchila,ra chenta e ro…… resto d´a colla nos aguarda.Ya en l´auto ros quilometros son trasquitos con ansia de i plegar. Dimpues de nabesar San Chuan de Plan una fastiosa pista enta Biados nos aspera,a pista s´enreliga con as augüas garonatas d´a zinqueta.Dimpues de muitos basons,tollos , aguatiellos plegamos dica o parquin que bi ha antis de Birchen Blanca,a ra cucha bellemos una pistota que cullirem e que nos amanara enta ra Collata Ordizeto e ro puerto d´a Madera.

Dimpues d´itar un mueso,torta,madalenas etz uns cafes con bellas glarimas d´esprito cullimos ista pista con rasmia,nabesando unas bordas en meyo d´os fenals que nos remera Ixos paisaches alpinos. Ye menister parar cuenta ta cullir o esbarre enta o nuestro destino, o pico Monto, ta ixo cuan dixamos ta zaga as bordas de Lisier cal cullir una endrezera enta ra dreita ,a man cucha bellemos  Es Falangóns, un picacho de 1909mts.

Es paisaches son magnificos,a berdor d´os fenal, es reguichuelos plens d´augua, as flors e ta ro mio goi,carrerons de muchardinas, que dimpues cullirem.

Seguindo as marcas blangas e amarillas nos enfilan enta ro puerto d´a madera,perem al canto d´o Barranco d´a Basa, que dixaremos e chiraremos a ra dreite do bi ye ro pico,pero a nusatros nos cuaca fer-lo mes difícil, asinas que s´achunta o ” senedrin “ e cullimos un alcorze o un trestallo e puyamos to reuto, en primeras per una chicota selba de rododrendos, luego ruellos e cascajo, un trango ta deban e dos ta zaga, asimas que con as mesachas cullimos una luenga de nieu ta puyar mes comodos. Anque ra costera ye pruo pronunziata. O Camín ye comodo,bichilante a imponente mole de Punta Suelza que emprimeras bi ye a ra cucha e dimpues dixamos ta zaga. O paisache ye impresionante,puyamos per a vertiente de a Bal de Chistau pero Ramón nos diz en o collado, que cambeemos de costau de Tabernes,…..ante nusatros amanezen os Culfreda,istas ambiestas nos fan sentarnos un inte e dixar que nos embolique,como dirba  Leo “ que paz  “anque ra  cumbre d´o Monto 2.478 mts nos aspera,iste inte ye solo ta nusatros.En apenas 10 ´plegamos al Monto, una segunda cumbre,O Penascriu de 2.475 mts nos aspera.Separato d´o Montó per  uns doszientos metros e per una cresta bien esmolata pero poco espuesta, fa una final diferent. Dende aquí,podemos beyer  un paisache circular, empezipia per Punta Suelza e rematando per os Barbarisa,pero clama a nuestra atención as bals d´a Zinqueta de ra Pez  y a Zinqueta d´añes Cruces,al fundo o puerto  De La Pez, punta Guerreis e ro impresionante Pic  de Lustou de 3.023mts ya en Franzia.

O deszenso lo femos per o camin normal,sin alcorzes,sin garra dificultad dica plegar enta ras cabanas de cubridors ,espaldatas, pero nos dan cacholeta,minchamos, itamos bel gotet d´a bota de Miguel,charramos,e baixamos enta ros autos, as muchardinas e unas birras nos asperan.

Tiengo de agradexer a Ramon que m´ amostrara ixe pico,me creigo que ye uno d´os millors,do os güellos nos fan chiribitas  rodeatos de muitos tresmils que tiengo en a mochila.   (Pedro Martínez)